اصقلها شيطان
- طبعًا يا حبيبتي وعشان تتأكدي من ذمتي أنا مقيد كل مليم خدته منك، وكدا بالفلوس دي يبقى وصلني منك عشرين ألف جنيه تحويش سنتين وشوية معايا.
عقصت سدرة حاجبيها پحزن.
- أنا كدا هزعل منك يا ماجد يعني اللي يسمعك بتقول كدا يقول أني مخوناك مثلًا.
هز ماجد رأسه بنفي.
- لا يا حبيبتي مش قصدي بس الحق حق وأنتِ لازم تبقي عارفة ليكِ كام معايا.
اومأت له سدرة بابتسامة عذبة.
- انا عمري كله ليك يا حبيبي ومش عايزة أعرف انا ليا معاك ايه ولا كام دا كفاية عليا أنت.
ثم نظرت في ساعة يدها وأشارت له كي تذهب.
- معلش بقى مضطرة امشي عشان متأخرش على مجموعة الأستاذ عبدالمتكبر.
نظر لها متعجبًا.
- هو أنتِ ناوية تروحي فعلًا مش دي نمرة عملتيها على جوز خالتك عشان تاخدي منه فلوس على حسها وبس.
زفرت سدرة بضيق ونفاذ صبر.
- كنت هعمل كدا لكن الست خالتي قررت أنها تيجي توصلني للحصة في معادها وطبعًا لو مروحتش وحست أني بکدب عليهم هتقلب الدنيا عليا وممكن تقعدني من التعليم خالص فانا هروح وخلاص هعمل ايه.
ضيق ماجد عينيه وسألها.
- طيب وفلوس الدرس هتدفعيها أزاي؟!!.
- كدا ممكن الأستاذ عبدالمتكبر يقول لجوز خالتك أنك مش بتدفعي ويسألوكِ هو وهالتك بتودي فلوسك فين.
هزت سدرة رأسها بلامبلاة.
