صدفة غيرت حياتي لكاتبتها ايمان شلبي
فوقت من شرودي علي سؤال " شريف" اللي مكنتش عارفه ارد عليه بأيه
هرد اقوله انا معرفش اخوك من الاساس هقوله اخوك ظهر قدامي فجأه وقولت أنه خطيبي عشان اغيظ خالتي وابنها !
سكت لحظه وانا بلف راسي وبقول بهدوء:
- انا معرفش اخوك اصلا
رد باستغراب:
- ازاي يعني ؟
اومال اللي حصل ده ايه انا مش فاهم حاجه
اتنهدت وانا ببص قدامي وبفرك ايدي بتوتر:
- بصراحه اخوك ظهر قدامي فجأه الصبح قدام خالتي وابنها اللي كان خطيبي زمان وانا اضطريت اقول إنه خطيبي قدامهم بس لا انا ولا اخوك نعرف بعض
هي كانت مجرد صدفه مش اكتر وحقيقي اخوك طلع شخص كويس جدا وفهم موقفي وكمل معايا في اللعبه وقالي اني لو حابه نكمل فيها للآخر أنه مفيش عنده مانع
انا حتي مكنتش اعرف اسم اخوك عشان كده لما شوفتك حصل سوء تفاهم،ا احم وبعيدا عن قله ذوقي وعن كلامي الدبش بس انا بعتذر جدا
ا انا هفهم مراتك كل حاجه وهختفي وهي أن شاء الله تقدر موقفي
ظهرت نص ابتسامه علي وشه وهو بيتنهد وبيقول باحترام:
- حصل خير ياستي وبعدين مايمكن اللي حصل ده يكون بدايه لحاجه تانيه
رديت باستغراب:
- مش فاهمه ؟!
رد عليا بمرح:
- مش لازم تفهمي المهم دلوقتي احنا لازم نقف عند حد بتاع ورد عشان نجيب لهانيا
سقفت وانا بضحك بحماس:
- اشطا جدا
ضحك باستغراب:
- مالك فرحتي كده ليه ؟!
اتنهدت وانا ببصله وبقول بصدق:
- لانك هتصالحها بالرغم انك مش غلطان من الاساس !
ابتسم وهو بيقولي بحب:
- هانيا تستاهل هديه في كل وقت وكل مناسبه هانيا البنت الوحيده اللي بعمل معاها كل حاجه من دون خجل ولا ضيق
تعرفي انا زمان قبل ما اعرفها كنت بعرف بنات كتيره اوي عمري في حياتي ما فكرت اشتري هديه ولا ورد لاي بنت مش بخل مني صدقيني بس انا كنت بحس أن الحاجات دي شكليات وملهاش اي لازمه
لحد ما عرفتها،اول ما عرفت انها بتحب الورد كنت معدي قدام واحد بتاع ورد افتكرتها لقيتني بدون تردد بنزل وبعمل احلي بوكيه وبختار كل ألوانه بكل حب لقيتني بشتري هديه وبقعد بالساعات عشان اجيب حاجه مناسبه من غير ما ازهق كل ده عشان بس اشوف ضحكتها
هانيا حبي الحقيقي هي اللي غيرت فيا كل حاجه هي اللي غيرتني وخلتني اشوف الدنيا بشكل جديد
وضحك وهو بيبصلي:
